काठमाडौं – प्रधानमन्त्री केपी शर्मा ओलीले नेपालमा स्थिर सरकारसँगै नीतिगत स्थिरता पनि भएकाले लगानीको राम्रो अवसर रहेको बताएका छन् । नेपाल लगानी सम्मेलन २०७५ को शुक्रवार उद्घाटन गर्दै प्रधानमन्त्री ओलीले लगानीको अवसरबारे बताएका हुन् ।
‘नेपालमा अहिले स्थिर सरकार, नीतिगत स्थिरता र सुस्पष्ट लक्ष्यका साथ अघि बढेको सरकार छ,’ प्रधानमन्त्री ओलीले भने, ‘म तपाईंहरूलाई मेरो विकासको सपनालाई मूर्तता प्रदान गर्न ७५ वटाभन्दा बढी आकर्षक परियोजना प्रस्तूत गर्दैछु ।’
प्रधानमन्त्री ओलीले नेपाल नेपालीको लामो समयदेखिको सामाजिक र आर्थिक रुपान्तरणको सपना पूरा हुँदैछ भन्ने आफूलाई विश्वास लागेको बताए । ‘विभिन्न देशबाट आएका लगानीकर्तालाई अपार अवसर भएको क्षेत्रमा लगानी गरी ३ करोड इमान्दार र मेहनती जनताको जीवनस्तर उकास्न सहयोग गर्नुस् भन्ने आह्वान समेत गर्दछु,’ प्रधानमन्त्री ओलीले भने ।
प्रधानमन्त्री ओलीले सरकारले आधार वर्षको रुपमा गएको १ वर्षलाई नीतिगत र कानूनी सुधार वर्षको रुपमा लिएको बताए । ‘यसबीच हामीले संविधानलाई कार्यान्वयन गर्न कैयन कानूनको निर्माण गरेका छौं,’ प्रधानमन्त्री ओलीले भने, ‘नयाँ कानूनी तथा नीतिगत संरचनाले विदेशी लगानीलाई उत्प्रेरित गर्ने वातावरण बनाएको छ ।’
प्रधानमन्त्री ओलीले नेपाललाई सन् २०३० सम्ममा सहस्राब्दी लक्ष्य हासिल गर्दै देशलाई मध्यमस्तरको आम्दानी भएको देशका रुपमा रुपान्तरण गर्न चाहेको बताए । ओलीले नेपाल व्यापार र लगानीका लागि तत्पर छ भन्ने कुरा सबैलाई अवगत गराउन चाहेको बताए ।
‘नेपाल व्यापार र लगानीका लागि तत्पर छ भन्ने मेरो सन्देश हो,’ प्रधानमन्त्री ओलीले भने, ‘सुरक्षित महसूस गर्नुहोस् र अवसरको फाइदा लिनुहोस् । तपाईंको लगानी संरक्षित र मुनाफा सुरक्षित छ । संसदमा भएका सबै राजनीतिक दलहरू वैदेशिक लगानीलाई प्रोत्साहित गर्न र भित्र्याउन एकमत छन् ।’
