काठमाण्डौ - एक महिनाअघि वीरगञ्जमा एसिड प्रहारबाट घाइते भएकी १५ वर्षीया बालिका मुस्कान खातुनले प्रधानमन्त्री केपी शर्मा ओलीलाई पत्र लेख्दै अपराधीलाई कडाभन्दा कडा सजाय माग गरेकी छिन् ।
उनले प्रधानमन्त्री ओलीलाई सम्बोधन गर्दै एसिड आक्रमण गर्नेमाथि कडाभन्दा कडा कानुन भइदिएको भए आज आफू अस्पतालको बेडमा नहुने पनि बताएकी छिन् ।
वीरगञ्ज महानगरपालिकाका-३, छपकैयाकी १५ वर्षीया छात्रा मुस्कान शुक्रबार बिहान विद्यालय जाँदै गरेको बेला उनीमाथि गएको भदौ २० गते स्थानीय दुई किशोरले एसिड प्रहार गरेका थिए ।
पढ्नुहोस् प्रधानमन्त्रीलाई मुस्कानको पत्र
माननीय प्रधानमन्त्रीज्यू,
म मुस्कान खातुन अन्सारी,
मेरो तर्फबाट नमस्ते । म एउटा तेजाब आक्रमणको नानी । हजुरलाई एउटा सानो चिठी । यो घटना मसँग घट्यो । यो घटनाको पीडा ठूलो पीडा हो ।
पहिले जेनी खड्का र संगीता मगरलाई तेजाब आक्रमण भएको बेला कडाभन्दा कडा कानुन भइदिएको भए आज म यो अस्पतालको बेडमा हुने थिइन होला । प्रधानमन्त्रीज्यू, हजुरको दुई तिहाई बहुमतको सरकार छ । प्रधानमन्त्रीज्यू, हजुरको ठाउँमा म भइदिएको भए त्यो अपराधी(तेजाब हान्ने) लाई फाँसी दिन्थेँ होला ।
यसपालि अपराधीले ठूलोभन्दा ठूलो सजाय पाओस् कि म जस्तो एउटा बलिकामाथि या चेलीबेटी र कसैमाथि तेजाब आक्रमण नहोस् । मैले जति पीडा खपेको छु, त्यो पीडा अरु कोहीमाथि पनि नपरोस् । यो पीडा भनेको सानो पीडा होइन ।
एउटा देशको ठूलो पीडा हो । आमा र बुवाको पनि पीडा धेरै ठूलो पीडा हो । यो घटना कसैको आमा र बुवाले खप्नु नपरोस् । त्यो दोषीलाई यसपालि ठूलोभन्दा ठूलो सजाय होस् । मेरो हजुरसँग बिन्ती र अपेक्षा छ । हजुरसँग मेरो एउटा अनुरोध छ कि मेरो एउटा पीडा बुझिदिनुहोस् । यो घटना कसैमाथि नहोस् । र अब तेजाब आक्रमणका कारण कोही पनि चेलीबेटी अस्पताल आउन नपरोस् भन्ने अनुरोध गर्दछु ।
धन्यवाद
हामीहरुको प्रधानमन्त्रीज्यू ।
