चीनको कोरोना प्रभावित हुबेइ प्रदेशबाट नेपालीलाई उद्धार गरेर ल्याउने क्रममा शंकास्पद देखिएका ६ जनालाई चीनमा सुरक्षित तवरले उच्च स्वास्थ्य निगरानीमा राखिएको स्वास्थ्य तथा जनसंख्या मन्त्रालयले जनाएको छ ।
मन्त्रालयका प्रवक्ता महेन्द्रप्रसाद श्रेष्ठले आइतवार प्रेस विज्ञप्ति जारी गर्दै विमानस्थलमा पुगेका १८१ जनामध्ये ६ जनामा शंकास्पद लक्षण देखिएकाले १७५ जनालाई सुरक्षित तवरबाट काठमाडौं ल्याइएको जनाएका छन् ।
मन्त्रालयका अनुसार चीनमै रोकिएका ६ जनामध्ये ४ जना पुरुष र २ जना महिला रहेका छन् भने नेपाल फर्काइएका १७५ जनामध्ये १३५ जना पुरुष र ४० जना महिला रहेका छन् ।
‘चीनको उहानदेखि काठमाडौंसम्मको यात्राको क्रममा कुनै पनि यात्रुहरूलाई स्वास्थ्य समस्या नदेखिएको एवं त्रिभुवन अन्तर्राष्ट्रिय विमानस्थलमा अवतरणपश्चात गरिएको स्वास्थ्य परीषणमा कुनै पनि नागरिकलाई स्वास्थ्य समस्या नदेखिएकोले सबै जनालाई सुरक्षित तवरले भक्तपुर खरिपाटीस्थित क्वारेन्टाइन गृहमा राखिएको छ,’ विज्ञप्तिमा उल्लेख छ ।
क्वारेन्टाइनमा राखिएका १७५ जनाको घाँटीको स्वाव नमूना संकलन भइसकेको र शंकास्पद लक्षण देखिएमा अस्पतालमा आइसोलेसनमा राखेर उपचार गर्ने व्यवस्था मिलाइएको जनाइएको छ ।
हेर्नुस् प्रेस विज्ञप्ति –
