काठमाडौँ — प्रहरीले विराटनगरबाट आएकालाई नागढुंगामा रोकेको ९ घण्टापछि छाडेको छ । विराटनर महानरपालिकाले बस रिजर्भ गरेर पठाएकासहित ६० जना यात्रु बिहान ९ बजेदेखि प्रहरीले नागढुंगामा रोकेर राखेको थियो ।
प्रहरीले ६ बजे छाडेको विराटनगरबाट आएका सुजन राईले बताए । ‘भर्खर छाड्यौ हिँड्दै छौं,’उनले भने । दिनभरी रोकेर साँझमा छाडेपछि कोठामा कसरी पुग्ने भन्दै उनीहरु आत्तिएका छन् । प्रहरीले ९ घण्टादेखि नागढुंगा नाकामा रोकेर राखेका यात्रुले आफूलाई नछाडेको भन्दै आक्रोशित भएका छन् । एउटै बसमा आएका यात्रुलाई छाडेर घर पुगे पनि आफू रोकिएको भन्दै उनीहरु आक्रोशित भएका हुन् ।
‘हामी धादिङबाट आएका होइनौं । हामी प्रहरीको कर्या चेकपोष्ट हुँदै नागढुंगा आइपुग्यौं,’नागढुंगामा रोकिएका पबित्रराज खत्रीले भने,‘रोक्ने भए हामीलाई विराटनगरमै किन नरोकेको ? बाटोभरीको प्रहरीले किन नरोकेको ? यहाँ आएर हामीलाई अलपत्र पारेर भर्खर छाड्यो ।’ दिउँसो १ बजे सीडीओ नै चेकपोष्टमा आएपछि आफूहरुलाई छाड्ने उनीहरुले आशा गरेका थिए । साँझसम्म पनि नछाडेपछि साना दूधे बालक भएका यात्रुहरु आत्तिएका थिए ।
प्रहरीले उनीहरुलाई ल्याउने बस भने काठमाडौं पठाइसकेको छ । ‘हामीसँगै आउने आधाभन्दा बढी साथीहरु नाम टिपाएर बिहान १० बजे नै गइसके । हामीलाई ल्याउने बस पनि गइसक्यो,’जगदीश भण्डारीले भने,‘हाम्रो स्वास्थ्य जाँच पनि दिउसै गरेको थियो । यतिबेला छाडेर कसरी घर जानु ?’ कान्तिपुर बाट साभार
