नेपाल कम्युनिस्ट पार्टी (नेकपा)का सांसद भीम रावलले अमेरिकी आर्थिक सहयोग परियोजना मिलेनियम च्यालेन्स कर्पोरेसन (एमसीसी) पछाडिको ढोकाबाट आउने कोशिश भइरहेको भन्दै विरोध गरेका छन् । सरकारका नीति तथा कार्यक्रममाथि प्रतिनिधि सभामा दोस्रो दिन सोमवारको छलफलमा भाग लिँदै नेकपा सांसद रावलले स्वाधीन र स्वतन्त्र देशमा आँच पुर्याउने सम्झौता कुनैपनि पैसामा नसाट्न उनले आग्रह गरे ।
‘हुन त नीति तथा कार्यक्रममा स्पष्ट आएको छैन, तर एमसीसी पछाडिको ढोकाबाट ल्याउन खोजे जस्तो बुझेको छु । हिजो नेपाली कांग्रेसका नेताले पनि एमसीसी पारित गर्नुपर्छ भन्नुभयो । महाकाली सन्धिमा पनि उहाँले त्यस्तै कुरा गर्नुभएको थियो । १० दश वर्षमा पुनरावलोकन गर्ने कुरा थियो । महाकाली सन्धिको न कार्यान्वयन भयो पुनरावलकोन,’ रावलले भने, ‘एमसीसी राष्ट्रहितविपरीत हुनेछ, स्वाधीन स्वतन्त्र देशको आँच पुर्याउने सम्झौता कुनैपनि पैसामा साट्न सकिँदैन ।’
आइतवारको बैठकमा प्रमुख प्रतिपक्षी दल नेपाली कांग्रेसका सभापति शेरबहादुर देउवाले एमसीसी अविलम्ब अनुमोदन गर्न सरकारको ध्यानाकर्षण गराएका थिए ।
नेता रावलले विदेशमा अलपत्र युवा स्वदेश फर्किन आवाज उठाइरहेकाले तिनीहरू स्वदेश फर्केमा रोजगारीमा लगाउन कृषि क्षेत्रको बजेट बढाउन आग्रह गरे ।
यसअघि शुक्रवार संघीय संसद्का दुवै सदन (प्रतिनिधि सभा र राष्ट्रिय सभा)को संयुक्त बैठकमा राष्ट्रपति विद्यादेवी भण्डारीले आर्थिक वर्ष २०७७/०७८ को लागि सरकारका नीति तथा कार्यक्रम प्रस्तुत गरेकी थिइन् । लोकान्तर बाट साभार
