काठमाण्डौं। आज सूर्यग्रहण लाग्दै छ । यो ग्रहणमा सूर्य बालाको आकारमा मात्रै देखिने भएपनि नेपालबाट खण्डग्रास सूर्यग्रहण मात्र देख्न सकिने ज्योतिषीहरुले बताएका छन् ।
आज सबैभन्दा लामो सूर्य ग्रहण लाग्ने छ । पञ्चाङ्ग निर्णायक समितका अनुसार आज लाग्ने सूर्यग्रहण बिहान १० बजेर ५० मिनेटबाट सुरु भई अपरान्ह २ बजेर २३ मिनेटमा समाप्त हुँनेछ । बिहानको १२ बजेर ३८ मिनेटमा करिब ८८ प्रतिशत ढाकिएको हुनेछ भने उक्त समयमा वातावरणीय तापक्रम घटेर चिसो अनुभव सबैले महसुस गर्ने बताइएको छ।
अबको करिब ४४ वर्षपछि मात्रै नेपालबाट वलय सूर्यग्रहण देखिनेछ । भारतको देहरादुन, कुरुक्षेत्र, चीनको तिब्बत, पाकिस्तानको दक्षिणी भाग, ओमान, इथियोपिया, दक्षिणी सुडान, मस्कट, यमन, कंगो आदि ठाउँबाट यो वलय सूर्यग्रहण देख्न सकिन्छ ।
नेपालकै भूभाग लिम्पियाधुरा, लिपुलेक तथा कालापानी क्षेत्रबाट भने सबैभन्दा धेरै ९८ प्रतिशतसम्म सूर्य ढाकिएको देखिनेछ । काठमाडौंबाट ८८ प्रतिशतसम्म सूर्य ढाकिएको देखिने बताइएको छ ।
धार्मिक मान्यताअनुसार यो सूर्यग्रहण मेष राशि, सिंह राशि, कन्या राशि तथा मकर राशि भएका मानिसले मात्र हेर्न हुन्छ । तथापि वैज्ञानिकहरु भने सूर्यग्रहण जो–कोहीले सुरक्षित तरिका अपनाएर हेर्न हुने भनेका छन् ।
यद्यपी, सूर्यग्रहण खाली आँखा, बाइनाकुलर वा टेलिस्कोपको प्रयोग गरेर कदापि पनि अवलोकन गर्नुहुँदैन । यसो गरेमा आँखा सदाका लागि बिग्रिने सम्भावना रहन्छ । हिमाल आरोहणमा प्रयोग गरिने विशेष प्रकारको गाढा रङको धातु लेपन भएको चस्माबाट मात्र अवलोकन गर्न सकिन्छ ।
