झापा- दमकस्थित मेची सहकारी संस्थाले एकीकृत सहकारी बस्ती निर्माण शुरू गरेको छ । जानकारीमा आए सम्म यस प्रकारको बस्ती नेपालकै पहिलो रहेको संस्थाको भनाइ छ ।२४ वर्ष अघि स्थापित संस्थाले ५२ ओटा एकै प्रकृतिका घर रहने सहकारी बस्ती बनाउन थालेको हो । दमक ४ मा १ विगाहा १६ कट्ठा जमिनमा बस्ती निर्माण शुरू भएको संस्थाका अध्यक्ष नारायणप्रसाद भट्टराईले जानकारी दिएका छन् ।संस्थाले आँफै जमिन खरिद गरी घर नभएका सदस्यलाई लक्षित गरी एकीकृत बस्ती निर्माण शुरू गरेको उनको भनाइ छ । प्रत्येक घरको लागत ३३ लाख रुपैयाँ रहने संस्थाका उपाध्यक्ष पदम थापाले जानकारी दिएका छन् ।
अनुदान होईन, सहुलियतसंस्थाले घर नभएका सदस्यलाई अनुदानमा उपलव्ध गराउन नभइ सहुलियतका लागि एकीकृत बस्ती बनाउन थालेको जनाएको छ । २ वर्ष अघि ४ करोड १७ लाखमा खरिद गरिएको जग्गा हाल खरिद गरेकै समयको मुल्यका आधारमा उपलव्ध गराईने र एकै पटक धेरै घर बनाउँदा लागत पनि कम हुने भएकाले सदस्यले सहुलियत महसुस गर्ने सहकारी बस्ती निर्माण समितिका संयोजक डिल्लीप्रसाद न्यौपानेले बताए ।घरको मुल्य करिव ३३ लाख पर्ने र ८ देखि १२ धुरसम्मका घडेरीसहितको मुल्य ४३ देखि ५१ लाख रुपैयाँ पर्ने संस्थाका प्रवन्धक खोमप्रसाद बगालेले जानकारी दिए । तर सदस्यहरुले सोही जमिनको धितोको आधारमा सहुलियत ऋण पाउने र २० वर्षको भुक्तानी अवधी उपलव्ध गराईने उनको भनाइ छ ।संस्थाले घर तथा जग्गाको स्वामित्व घरधनी शेयर सदस्यलाई हस्तान्तरण गरे पनि ५ वर्ष बिक्री गर्न नपाईने नियम बनाईएको छ । आगामी वर्षको भदौ सम्ममा बस्ती निर्माण पूरा गरी हस्तान्तरण गर्ने संस्थाको लक्ष्य छ ।
झापा, मोरङ र इलामका ८ स्थानबाट कारोवार गरी रहेको संस्थाले आफ्नो प्रत्येक कारोवार स्थानीय तहमा एकीकृत सहकारी बस्ती विकास गर्ने लक्ष्य रहेको जनाएको छ ।पहिलो बस्तीको नतिजा अनुसार अन्यत्र पनि बस्ती विकास गरिने अध्यक्ष भट्टराईको भनाइ छ । सदस्यहरुको आय स्तरका आधारमा पहिलो बस्ती भन्दा कम र बढि लागतका बस्तीको अवधारणा ल्याईने उनको भनाइ छ ।सहकारी बस्तीका घर ओगटेर खरिद बिक्री गरी कसैले नाफा कमाउने अवस्था नआओस भनेर यो नियम बनाईएको अध्यक्ष भट्टराईले बताए । कम आयस्तर भएका सदस्यहरुलाई लक्षित गरी यस पछि अर्को एकीकृत बस्ती निर्माण गरिने उनको भनाइ छ । ८ हजार शेयर सदस्य रहेको संस्थाको शेयरपूँजी हाल करिव २९ करोड रुपैयाँ छ ।
