झापाको हल्दिबारीमा एक व्यक्ति खोलामा डुबेको अवस्थामा मृत फेला

झापाको हल्दिबारीमा पानीमा डुबेर एक जनाको मृत्यु भएको छ । मृत्यु हुनेमा हल्दिवारी गाउँपालिका ४ निवासी ३३ वर्षीय रामबहादुर थारु चौधरी रहेको प्रहरी कार्यालय झापाका डिएसपी राकेश थापाले जानकारी दिए । सोही ठाउँका स्थानीय कैलाश आचार्यको घरमा घरेलु कामदारको रुपमा काम गर्दे आएका चौधरी शुक्रवार बिहान सवा ७ बजेको समयमा स्थानीय काजली खोलामा डुबेको अवस्थामा मृत फेला परेका हुन् । खोलामा कसरी डुबेर मृत्यु भयो भन्ने केही नखुलेको प्रहरीले जनाएको छ । यता घटनाको विषयमा प्रहरी कार्यालय झापाबाट खटिएका प्रहरी टोलीले अनुसन्धान गरिरहेको छ । शवलाई पोस्टमार्टमका लागि मेची अञ्चल अस्पताल लगिएको प्रहरीले जनाएको छ ।