विष्णुप्रसाद पोखरेल
दमक/ झापाको दमकस्थित सरकारी दमक अस्पतालमा अक्सिजन प्लान्ट निर्माणपछि हस्ताण्तरण गरिएको छ । अक्सिजन उत्पादनको परिक्षण गरेर सफल भएपछि दमक नगरपालिका मातहतको दमक अस्पतालले अक्सिजन प्लान्टको जिम्मा लिएको हो ।
विश्व बैंकको कार्यक्रम ‘कोभिड–१९ इमर्जेन्सी रेस्पोन्स एन्ड हेल्थ सिस्टम प्रिपेयडनेस प्रोजेक्ट’अन्तर्गत रहेर यो अक्सिजन प्लान्ट बनेको अस्पतालकी अध्यक्ष समेत रहनु भएकी दमक नगरपालिका उपप्रमुख गीता अधिकारीले बताउनु भयो । डेढ बर्ष अघिदेखि यो काम शुरु भएको थियो ।
कम्तिमा तीन वर्षसम्मको सञ्चालन तथा मर्मत सम्भारको काम युनाइटेड नेसन अफिस फर प्रोजेक्ट सर्भिसेज (युएनओपीएस) मार्फत हुने पनि जनाएको छ । प्रतिघण्टा ४० घनमिटर उत्पादन क्षमताको प्लान्टले अब यस क्षेत्रमा अक्सिनको समस्या नआउने पनि अधिकारीले जानकारी दिनु भएको छ ।
अस्पतालको सुविधा सम्पन्न भवन निर्माण भइरहेकाले अब हरेक बेडमा पाइपलाइनबाट अक्सिजन पुर्याईने पनि अधिकारीको भनाई रहेको छ । अहिले तत्काल आवश्यकता अनुसार सिलिण्डरमा अक्सिजन भरिने छ । बि.सं २०७३ सालमा हेल्थ पोष्टबाट स्तरउन्नती भएर १५ शैयाको दमक अस्पताल बनेको हो ।
दमक अस्पतालले कोभिड महामारीको समयदेखि बेग्लै कोभिड अस्पताल सञ्चालन गरिरहेको छ । ५० जनासम्मको उपचार क्षमताको बेग्लै संरचना सहितको कोभिड अस्पताल दमक अस्पताल मातहत रहेको छ । कोभिड महामारीमा कमी आएसंगै अहिले उक्त अस्पताल अस्थाई रुपमा बन्द गरिएको छ ।
स्वास्थ्य मन्त्रालयमार्फत यस अस्पतालमा यो परियोजना आएको र यसले दमक नगरपालिका मातहत रहेको दमक अस्पतालको स्तरउन्नतीमा सहयोग पुग्ने अपेक्षा लिईएको दमक नगरपालिका प्रमुख रोमनाथ ओलीले बताउनु भयो । अस्पताल स्तरन्नतीका लागि सम्बन्धित निकायमा माग पनि गरिदै आएको छ, नगर प्रमुख ओलीले भन्नुभयो ।
यो अस्पताल सरकारी विमा कार्यक्रम अन्र्तगत दमक नगरपालिका सहित आसपासका नगरपालिका र गाँउपालिका भित्रका बिमित नागरिकहरुको पहिलो विन्दु अस्पताल हो । यहाँ दैनिक १ हजारभन्दा बढि विरामीहरुले ओपिडि सेवा लिदै आएको दमक अस्पतालकी सूचना अधिकारी देबी दंगालले बताउनु भयो ।
अस्पतालको नयाँ भवन निर्माणका लागि २०७७ असार १९ गते सम्झौता भएर ३० महिनाभित्र काम सक्ने गरी लुम्बिनी अर्घखाँची निर्माण सेवाले ठेक्का लिएर काम गरिरहेको जनाईएको छ । २० करोड ४ लाख २९ हजार ४०८ रुपैँयाको लागतमा भवन निर्माणको काम भइरहेको छ, दंगालले भन्नुभयो ।
