नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टीका प्रवक्ता खड्गबहादुर विश्वकर्मा ‘प्रकाण्ड’लाई ८ दिन थुनामा राखेर अनुसन्धान गर्न जिल्ला अदालत दाङले आदेश दिएको छ ।
म्यादी प्रहरी विनोद चौधरीको हत्या गरेको आरोपमा आइतबार दाङ पुर्याइएका प्रकाण्डविरुद्धको मुद्दामाथिको पहिलो सुनुवाइपछि अदालतले अबको ३ दिनमा यथेष्ठ प्रमाणसहित उपस्थित हुन प्रहरीलाई आदेश जारी गरेको हो ।
नेपाली कांग्रेसको चुनावी सभालाई लक्षित गरी गत मंसिर १२ मा दाङको तुलसीपुरमा गराइएको बम विस्फोटमा परी तुलसीपुर उपमहानगरपालिका–१८ निवासी २३ वर्षीय म्यादी प्रहरी विनोद चौधरीको ज्यान गएको थियो । सोही घटनालाई लिएर विश्कर्माविरुद्ध जिल्ला प्रहरी कार्यालय दाङले कर्तव्य ज्यान मुद्दा दर्ता गरेको थियो ।
दाङ प्रहरीका अनुसार विश्वकर्मामाथि लगाइएको यो सबैभन्दा ठूलो मुद्दा हो । भोजपुरबाट धरौटीमा छुटेका विश्वकर्मालाई फेरि पक्राउ गरी प्रहरीले दाङ पुर्याएको हो ।
